कालेबुङमा अन्तर्राष्ट्रिय योग दिवस पालन ....मेला ग्राउण्डलाई स्टेडियम बनाउन 50 करोड अनुमोदन गरेको छु – विमल गुरुङ

डी.के. वाइबा, कालिमन्युज, कालेबुङ 21 जून। हिमालय योग संस्थाको आयोजनामा आज यहाँको मेला ग्राउण्ड अन्तर्राष्ट्रिय योग दिवस पालन गरियो। यस अवसरमा जिटिए प्रमुख विमल गुरुङ, लोकसभा सांसद एस.एस आहलुवालीया विशेष रूपले उपस्थित रहेका थिए।

यसक्रममा जिटिए उपप्रमुख अवकाश प्राप्त कर्णल रमेश आले, कप्तान प्रकाशमणी प्रधान लगायत विभिन्न समष्टि सभासद, नगरपार्षद अनि विद्यालय प्रमुखहरूको पनि उपस्थिति रहेको थियो। विहानै देखि पानी परिरहेको अवस्थामा पालन गरिएको उक्त अन्तर्राष्ट्रिय योग दिवसमा विभिन्न विद्यालयका विद्यार्थीवर्ग, शिक्षकगण लगायत विभिन्न संघ संस्थाका प्रतिनिधीवर्गले पनि योग दिवसमा भाग लिएका थिए।

एस.यु.एम आई विद्यालयका शिक्षक शुभ प्रधानले सञ्चालन गरेको कार्यक्रम हिमालय योग संस्थाका अध्यक्ष किरण सिंहले स्वागत सम्बोधन राख्दै योगको विशेषता विषयमा जानकारी गराएका थिए। यस अवसरमा संस्थाका पक्षबाट महेश गुप्त अनि समिर घोषले उपस्थित सबैलाई एकैसाथ योग अभ्यास गराएका थिए।

अन्तर्राष्ट्रिय योग दिवस कार्यक्रममा विशेषरूपले भाग लिन आइपुगेका विमल गुरुङ अनि सांसद एस.एस आहलुवालीयाले पानी परिरहेको अवस्थामा पनि उपस्थित विद्यार्थीवर्गहरूसँगै पानीमा भिजेर नै योग अभ्यास गरेका थिए।

यसक्रममा उनले प्रधानमन्त्री नरेन्द्र मोदीले योगलाई विश्वमा नै परिचित गरेको बताउँदै योग अप्नाए स्वास्थ्यमा सुधार आउने बताएका छन्।

यसैवीच कालेबुङ मेला ग्राउण्डलाई पहाडकै उत्कृष्ट स्टेडियम बनाउने जीटीए प्रमुख विमल गुरुङले घोषणा गरेका छन्। उनले स्टेडियम निर्माणका निम्ति आफूले 50 करोड रूपिया अनुमोदन गरिसकेको पनि बताएका छन्।

‘पानी पर्दा धानबारी जस्तो देखिने मेला ग्राउण्डलाई पहाडकै उत्कृष्ट स्टेडियम बनाउने योजना रहेको छ। यस कार्यको निम्ति हिज मात्रै मैले 50 करोड रूपियाँ अनुमोदन गरिसकेकोछु’ – विमल गुरुङले भने।

उनले कालेबुङमा जीटीए क्षेत्रकै सर्वोत्कृष्ट स्टेडियम निर्माणको निम्ति स्वतन्त्र दिवस समारोहमा नै घोषणा गरेको प्रसङ्ग झिक्दै कतिपय कुराहरूले रोकावट भएको पनि आफ्नो सम्बोधनमा बताएका छन्।

‘यहाँ केहि कुराहरूले गर्दा रोकावट भएको छ’ भने। यद्यपी उनले कसले रोकावट गरिरहेको छ भन्ने कुराको भने सार्वजनिक गरेनन्।

खुल्ला आकसमुनी रहेको मेला ग्राउण्डमा कतिपय कार्यक्रमहरू सम्पन्न हुँदा मानिसहरूलाई असुविधा हुने गरेको बताउँदै स्टेडियम निर्माण भएपछि विद्यार्थीवर्गलाई सुविधा हुने पनि विमल गुरुङले बताए।

‘यस ग्राउण्डलाई लिएर राजनीतिकरण गर्नु हुँदैन। यो सम्पूर्ण कालेबुङका जनताको निम्ति हो। यसलाई राम्रो बनाउनका निम्ति सम्पूर्ण कालेबुङका जनताले सहयोग गर्नुपर्नेछ’-विमल गुरुङले भने। 

उनले कालेबुङलाई आफ्नो पक्षबाट राम्रो कार्य गर्न चाहेको बताउँदै कालेबुङका जनताको समस्याहरू बुझ्नका निम्ति उनी केहि दिनपछि दुई-तीन महिना बस्नेगरी आउने बताए। 

आफ्नो सम्बोधनको क्रममा गुरुङले योगले मानिसलाई मानसिक अनि शारीरिक स्वास्थ्य स्वस्थ राख्ने गरेको बताउँदै भविष्यमा मेला ग्राउण्डमा स्टेडियम बनिएपछि यस्ता योग शिविरहरूको आयोजना गर्न अझ सजिलो हुने बताए। 

अर्कोतर्फ कार्यक्रमलाई सांसद एस.एस आहलुवालीयालले सम्बोधन गर्दै प्रधानमन्त्री नरेन्द्र मोदीले युनाइटेड नेशनमा योगको विशेषाताबारे अवगत गराएपछि 21 जूनलाई अन्तर्राष्ट्रिय योग दिवसको रूपमा पालन गर्ने घोषणा गरिएको बताए। 

उनले योग अभ्यास गर्नाले मानिसहरू मानसिक अनि शारीरिक स्वास्थ्य स्वस्थ हुने बताउँदै सबैले योग अभ्यास गर्न आवश्यक रहेको जानकारी गराए। 

कालेबुङ महाविद्यालयमा विश्व योग दिवस पालन 

21 जुन 2016, कालेबुङ : आज अन्तर्राष्ट्रिय योग दिवसको अवसरमा कालेबुङ महाविद्यालयमा फाइभ बेङ्गल एनसीसी बटालियन, दार्जिलिङले विशेष कार्यक्रमको आयोजना गऱ्यो। 

कार्यक्रममा महाविद्यालयका प्राचार्य डा. आर. पी. ढकाल, कालेबुङ महाविद्यालय एनसीसीका लेफ्टिनेन्ट डा. डी. सी. रोय (एएसओ), फाइभ बेङ्गल एनसीसी बटालियन, दार्जिलिङका सुबेदार रवि कुमार, तेजवीर सिंह अनि इन्द्रबहादुर थापा, महाविद्यालयका सुपरिन्टेन्डेन्ट श्री बलभद्र शर्मा लगायत महाविद्यालयका प्राध्यापक प्राध्यापिकाहरू उपस्थित थिए। 

पूर्वीय राष्ट्रहरूमा मात्रै नभएर आज संसारका प्रत्येक राष्ट्रमै बढिरहेको योगको मूल्य र महत्त्वबारे प्रकाश पार्दै महाविद्यालयका प्राचार्य डा. आर. पी. ढकालले आफ्नो मन-मस्तिष्क र शरीरलाई स्वस्थ राख्नका निम्ति योगको महत्त्व बुझी यसलाई यसरी वर्षमा एकचोटि मात्रै होइन, हामी सबैले आफ्नो दैनिक कार्यतालिकाभित्रै राखी दैनिक रूपमा योगाभ्यास गर्नुपर्ने जनाए। 

कार्यक्रममा कालेबुङ एनसीसीका एकाउन्न, एसयुएमआईबाट एनसीसी एकाइ 442 का एक सय अनि एकाइ 629 का एक सय, डा. ग्राहम्स् होम्सका बत्तीस, कुमुदिनी विद्याश्रमका नब्बे अनि आर्मी पब्लिक स्कुलका पच्चीस गरी जम्मा तीन सय अन्ठानब्बे एनसीसीका विद्यार्थीहरूले अंश ग्रहण गरेका थिए। 

कार्यक्रममा उपस्थित यी सबै विद्यार्थीहरूलाई कालेबुङ महाविद्यालयका एनसीसी क्याडेट श्री मन्नु महतोले योगका विभिन्न पद्धतिबारे जानकारी र अभ्यास गराए। कार्यक्रममा एएनओ पदमा रहेका एसयुएमआईका प्रणव राई, कुमुदिनी विद्याश्रमका अमृत लेप्चा अनि आर्मी पब्लिक स्कुलका रूपेश राईको पनि विशेष उपस्थिति रहेको थियो।