लाभा-कोलाखामको जनजीवन अझपनि हुनसकेको छैन साम्य ..... क्षेत्रकै पैह्रो पीडितहरूलाई विभिन्न सङ्घ-संस्थाद्वारा राहत सामग्री प्रदान,

प्रज्जवल छेत्री, कालिमन्युज, कालेबुङ, 14 जुलाई 2015: लाभा-कोलाखाम क्षेत्रका पैह्रो पीडितहरूलाई अहिले विभिन्न सङ्घ-संस्थाले राहत वितरण गर्ने काम गरिरहेको छ।

यूरेसिया रेयुकाई, राष्ट्रिय स्वयंसेवक दल आदिले आइतबार पैह्रोजन्य क्षेत्रहरूको भ्रमण गरी पीडितहरूलाई आवश्यक सामग्री अनि चिकित्सा प्रदान गरे । कालेबुङ खण्ड दुईको सबैभन्दा धेर प्रभावित लाभा-कोलाखाम क्षेत्रमा सैयौ परिवार विस्थापित बनेका छन् भने सैयौ मानिसहरूको व्यापक रूपमा जनधनको नोक्सानी भएको छ।
लाभा-कोलाखाम, रबेक क्षेत्रका अधिकांश परिवार विभिन्न शिविरहरूमा आश्रय लिएर बसिरहेका छन्। हालसम्म पनि यी क्षेत्रहरूको जनजीवन समान्य बन्न सकिरहेको छैन। उनीहरू मध्ये अधिकांशले आफ्नो घरबार गुमाएका छन् भएका खेतीजन्य जमीन पैह्रोले सोहोरेर लगिदिएको छ। यस्तोमा उनीहरूसित शिविरमा बसेर जीवन धान्नु बाहेक् अन्य कुनै विकल्प छैन।

रबेक-कोलाखाम क्षेत्रमा मानिसहरूको पीडा अन्तन्य सोचनीय रहेको छ। धेरजसो मानिसहरू कृषि क्षेत्रमा निर्भर रहेका कारण उनीहरूले आफ्नो घरसितै अन्नबाली पनि गुमाएपछि अहिले उनीहरूको जीवन कष्टकर बनेको छ। आफू बसेको ठाउँ नै छोडेर विस्थापित बन्न परेपछि स्थानीय नानीहरू स्कूल जान सकिरहेका छैनन्। भाग्यले ज्यान जोगिएपनि आफ्नै सर्वस्व गुमाएका कारण फेरि कहिले जीवन सामान्य होला भन्ने प्रतीक्षामा उनिहरु छन्।

30 जूनको राती आएको अविरल वर्षापछि घरबीहिन बनेका लाभा कोलाखामबासीलाई अहिले विभिन्न सङघ-संस्थाहरुले पनि राहत सामग्रीहरू प्रदान गरेर सहयोगिताको हात बढाइरहेको छ। जस अन्तर्गत युरेसिया रेयुकाई, अखिल भारतीय विद्यार्थी परिषद् दार्जीलिङ एकाईँ, सिडि भीजन, राष्ट्रिय स्वयंसेवक सङ्घ आदिको प्रयासमा लाभा-कोलाखाम क्षेत्रका पैह्रो पीडितहरूलाई आवश्यकीय सामग्रीहरू वितरण गरिएको छ।

युरेसिया रेयूकाई राहत समितिद्वारा सेउले पोखरी डाँडाका लगभग 105 परिवारका सहयोगका निम्ति च्यादर, प्लास्टिक टेन्ट लगायत खाद्य सामग्रीहरू प्रदान गरिएको छ। यसरी नै अखिल भारतीय विद्यार्थी परिषद अनि सीडी भिजनको सौजन्यमा उत्तर बङ्गाल मेडिकल कलेजका डाक्टर अग्निभव बन्दोपाध्याय, डा. शिखर मिश्रा, डा. राजीव कुमार सिंह आदिका टोलीद्वारा क्षेत्रका पीडितहरूको निःशुल्क स्वास्थ्य जाँच गरी औषधी प्रदान गरिएको छ।

यसरी नै अर्कोतिर राष्ट्रिय स्वयंसेवक सङ्घ कालेबुङ अनि सेवा विभाग उत्तर बङ्ग सेवा भारतीको तर्फबाट पनि पीडितहरूलाई कम्बल, टेन्ट र लुगाफाटाहरू वितरण गरिएको छ। राहत सामग्री वितरण कार्यक्रम अवधि यूरेसिया रेयुकाईका मुख्य संयोजक उदय चन्द्र अधिकारी, किरण शोभा, सुमन कुमार बस्नेत, ग्याल्पो छिरिङ भोटिया आदि रहेका थिए भने आरएसएसका पक्षमा महेश गुप्ता, सन्तोष शर्मा, राजेद्र गर्ग आदि उपस्थित थिए।