केन्द्रीय स्वास्थ्य बीमा योजना जीटीएवासीले नपाएको माकपाको आरोप

डी.के. वाइबा, कालिमन्युज, कालेबुङ 31 मार्च। गोर्खाल्याण्ड क्षेत्रिय प्रशासन अन्तर्गत आर्थिक विपन्न परिवारवर्गले ­केन्द्र सरकारद्वारा सञ्चालित स्वास्थ्य बीमा योजना प्राप्त नगरिरहेको मार्क्सवादी कम्युनिष्ट पार्टी (माकपा) नेता तारा सुन्दासले आरोप लगाएका छन्। यस सम्बन्धमा सुन्दासले माकपा कालेबुङ आञ्चलिक समितिको पक्षमा जिल्लापाल दार्जीलिङ समक्ष ज्ञापन पत्र सुम्पिएर उक्त योजना सम्बन्धि ध्यान आकर्षण गराएका छन्। 

जिल्लापाल दार्जीलिङ समक्ष सुन्दासले उक्त ज्ञापन पत्र चढाएर प्रशासनको ध्यान आकर्षण गराएको आज यहाँको पार्टी कार्यलयमा एक पत्रकार सम्मेलन डाकेर जानकारी गराए। ‘भारत सरकारको स्वस्थ्य बीमा योजना गोर्खाल्याण्ड क्षेत्रिय प्रशासनमा गत जुलाई महिना 2014 देखि बन्द अवस्थामा छ। यहाँका आर्थिक विपन्न परिवारवर्गले उक्त लाभ उठाउँन सकेको छैन। यसकारण यस सम्बन्धमा यथाशिघ्र कार्वाही गर्दै जीटीए क्षेत्रका आर्थिक विपन्न परिवारवर्गलाई राष्ट्रीय स्वास्थ्य बीमा योजनाको लाभ पाउनुपर्छ भन्ने हाम्रो माग हो’ – तारा सुन्दासले भने। 

गोर्खाल्याण्ड क्षेत्रिय प्रशासनका मानिसहरूलाई सरकारले षडयन्त्र गरेर केन्द्रीय योजनाहरूबाट समेत बञ्चित राख्ने कार्य गरिरहेको आरोप लगाउँदै यस विषयमा बङ्गाल सरकारले झट्ट उचित पहल गर्नुपर्ने पनि माग सुन्दासले गरे। पहाडका मानिसहरूले अहिलेसम्म न्याय नपाएको आरोप लगाउँदै यस्ता सहुलियहतहरू पश्चिम बङ्गाल सरकारले किन गोर्खाल्याण्ड क्षेत्रिय प्रशासनमा बन्द गरेको भनि उनले प्रश्न गरे। 

यस विषयमा गोर्खाल्याण्ड क्षेत्रिय प्रशासनले गरिब जनताको हितमा एउटा प्रस्ताव पारित गर्नुपर्ने माग गर्दै मुख्य मन्त्री ममता ब्यानर्जीले यसको जवाब दिनुपर्ने पनि सुन्दासले माग गरे। गरिब जनतालाई अवहेलना गर्ने कार्य बारम्बार भइरहेको आरोप लगाउँदै आफ्नो हक अधिकारको निम्ति जनता पनि सचेत र सजक भएर अघि बड्नुपर्ने उनले आह्वान गरे। 

‘गरिब जनताको पनि बाँच्ने अधिकार छ। बाँच्ने अधिकार हुँदा हुँदै पनि अहिलेघरी यसरी केन्द्रीय स्वास्थ्य बीम योजनाबाट बञ्चित राख्नु दुर्भाग्यपूर्ण हो। यस सम्बन्धमा हाम्रा बिधायकवर्गले आवाज उठाउँनुपर्छ। गरिब जनतालाई अवहेलना गर्ने कार्य हुँदा बिधायकहरू किन मौन बस्छन् ?” सुन्दासले प्रश्न तेर्साए।