विभिन्न क्षेत्रको भ्रमणमा जीटीए प्रमुख बिमल गुरूङ व्यस्त

डी.के. वाइबा, कालिमन्युज, सिलगडी 28 मार्च। गोर्खाल्याण्ड क्षेत्रीय प्रशासन प्रमुख बिमल गुरूङ हप्ता दिनदेखि कालेबुङमा डेरा हालेर बसेका छन्। यस अवधी अनले विभिन्न क्षेत्रहरूको भ्रमण गर्ने कार्य जारी राखेका छन्। 

यसक्रममा उनले आज रम्फू मन्सोङ समष्टिको परिभ्रमण गरे। उनले आफ्नो भ्रमण अवधी साङ्से सिन्कोना कमानको प्राथमिक पाठशाला निर्माणको निम्ति 30 लाख अनि सार्वजनिक भवन निर्माणको निम्ति 25 लाख दिने घोषणा गरेका छन्। 

साङ्से खेल मैदानमा आयोजित भेटघाट कार्यक्रममा जीटीए प्रमुख बिमल गुरूङले छोटो सम्बोधन गर्दै उक्त घोषणा गरेका हुन्। क्षेत्रवासीको दिर्घदिन देखिको मागलाई ध्यानमा राखे उनले क्षेत्रवासीलाई आफ्नो पक्षबाट आगमी दिनहरूमा सक्दो कार्य गर्ने आश्वासन पनि दिएका छन्। गत 26 मार्चको दिन कालेबुङ आइपुगेका गुरूङले आज 39 नम्बर रम्फू मन्सोङ समष्टि अन्तर्गत साङ्से बस्ती अनि साङ्से सिन्कोना कमानको परिभ्रमण गरे। जीटीए प्रमुख गुरूङ आज बिहान सर्वप्रथम साङ्से बस्ती पुगेर क्षेत्रको भागेदेखि फिक्कलेसम्म निर्मित लकभग 4 किलोमिटर कच्चा सडकको पैदल हिडेर परिभ्रमण गरे। 

यस अवधी उनलाई क्षेत्रका मानिसहरूले खदा माला लगाएर भव्य स्वागत जनाएको थियो। क्षेत्रमा कच्चा सडकको कारण मानिसहरूले यातायातको असुविधा दिर्घ दिनदेखि भोग्न परिरहेको कुरा गुरूङलाई यसै परिभ्रमण अवधी स्थानीय मानिसहरूले सुनाउँदै क्षेत्रमा पक्का सडक निर्माणको माग गरे। ग्रामवासीले उक्त कच्चा सडक अहिलेसम्म केन्द्र सरकारको नरेगा योजना अधिनस्थ मरमती गर्ने कार्य गरिरहेको अवगत गराउँदै यसलाई प्रधानमन्त्री ग्राम सडक योजना अधिनस्थ पक्का सडक निर्माण गरिदिने जीटीए प्रमुख गुरूङलाई अनुरोध गरेका थिए। 

सोहीक्रममा गुरूङले साङ्से निम्नोच्च विद्यालयको पनि परिभ्रमण गरेर जानकारी लिएका छन्। उक्त निम्नोच्च विद्यालय क्षेत्रका मानिसहरूले सन् 2005 मा स्थापित गरेर सञ्चालन गर्दै आइरहेको भए पनि आजसम्म सरकारी मान्यता भने प्राप्त गर्न नसकेको पनि विद्यालय सण्ज़्चालन समितिले गुरूङलाई अवगत गराएको थियो। वर्तमानमा 7 जना शिक्षण अनि 2 जना अशिक्षण कर्मचारीवर्गले सत्प्रयासमा सञ्चालन हुँदै आएको उक्त निम्नोच्च विद्यालयलाई जीटीएको पक्षबाट सरकारी मान्यताको निम्ति पहल गरिदिनुपर्ने पनि माग गरे। 

यसक्रममा गुरूङले आगामी अप्रेल महिनादेखि उक्त निम्नोच्च विद्यालयमा कार्यरत शिक्षण कर्मचारीवर्गलाई मासिक तीन हजार रूपियाँ अनि अशिक्षण कर्मचारीवर्गलाई पच्चिससय रूपियाँ जीटीएको पक्षबाट प्रदान गर्ने गुरूङले घोषणा गरे। 

अर्कोतर्फ यसै भ्रमण अवधी बिमल गुरूङ साङ्से बस्तीबाट सोझै साङ्सेर सिन्कोना कमान पुगेका थिए। यस अवधी साङ्सेर खेल मैदानमा उनलाई क्षेत्रवासीले भव्य स्वागत जनाएको थियो। गुरूङको उक्त परिभ्रमणलाई केन्द्र गरेर क्षेत्रवासीले साङ्सेर खेल मैदानमा एउटा भेटघाट कार्यक्रम आयोजना गरेको थियो। उक्त कार्यक्रममा क्षेत्रका सभासद गोपाल रूचाल, अन्य सभासदहरू क्रमैले सी.पी पौड्याल, दावा लेप्चा, कल्पना तामाङ, काजिम छिरिग़ भोटिया, गोजमुमो केन्द्रिय समिति सदस्य बिजय सुन्दास, युवा मोर्चा अध्यक्ष बारूद थापा विशेष रूपले उपस्थित रहेका थिए। 

यसक्रममा कार्यक्रमलाई क्षेत्रका सभासद गोपाल रूचाल, बिजय सुन्दास, बारूद थापाले सम्बोधन गर्दै छुट्टै राज्य गोर्खाल्याण्ड प्राप्तिको निम्ति सबै एकबद्ध बन्नुपर्ने आह्वान गरेका थिए। अहिलेघरी एकातिर छुट्टै राज्यको आन्दोलनलाई गोजमुमो पार्टीले अघि बडाउने कार्य गरिरहेको छ भने बिकासका कार्यहरू पनि गरिरहेको अवस्थामा जनताले मोर्चालाई साथ दिनपर्ने पनि वक्ताहरूले आह्वान गरे।