फोनको स्टोरेज डेटा डिलिट नगरी कसरी बढाउन सकिन्छ ?

काठमाडौँ । स्मार्टफोन फोन गर्न वा म्यासेज पठाउनमा मात्र सीमित छैनन् । आजको युगमा यसले हाम्रो अनेकौँ काम सहज बनाइदिएको छ । यसमा हामी सहजै आफ्ना अनेकौँ डेटाहरू स्टोर गरेर राख्न सक्छौँ । यसका लागि कम्पनीहरूले स्टोरको राम्रो विकल्प पनि दिएको हुन्छ । तर कहिलेकाहीँ फोनको स्टोर सकिएर अनेकौँ समस्या भोग्नु परिरहेको हुन्छ ।

धेरैजसो मानिसहरू आफ्नो फोनमा फोटो, भिडियो, डकुमेन्ट र अनेकौँ फाइलहरू राख्छन् । यस्तो बानीले केही समय पछि फोनको स्टोर पूरै भरिन्छ । त्यसपछि फोन निकै स्लो हुन थाल्छ । नयाँ फोटो खिच्नु पर्‍यो वा केही डकुमेन्ट राख्नु पर्‍यो भने फोनबाट केही चीजहरू हटाउनुपर्ने हुन्छ । यसो गर्दा आफ्ना लागि महत्त्वपूर्ण डेटा पनि हटाउन पर्ने स्थिति आउँछ । आजको यस लेखमा हामीहरू फोनमा भएका डेटा डिलिट नगरीकन फोनको स्टोरेज बढाउने उपायहरूबारे कुराकानी गर्नेछौँ ।

फोनमा स्टोरेज भरिने समस्या किन आउँछ ?

– स्मार्टफोनमा कयौँ एपहरू हुन्छन् ।  एप जति धेरै भयो यसले त्यति नै धेरै स्टोरेज ओगट्छ ।

– फोनमा उच्च रिजोल्युसनका फोटा र भिडियोहरू धेरै छन् भने पनि यसले फोनको स्टोरेज खाइदिन्छ ।

– फोनको इन्टरनेट स्टोरेजमा गीतहरू डाउनलोड गरेर राख्नुभयो भने स्टोरेज खपत हुन्छ ।

– फाइल र ब्राउजर हिस्ट्री अनि क्याशे डेटाले पनि फोनमा अतिरिक्त ठाउँ लिन्छ र स्टोरेज कम हुन्छ ।

कसरी बढाउने स्मार्टफोनको स्टोरेज

–स्मार्टफोनमा यस्ता धेरै एपहरू हुन्छन् जुन हामीले सायद वा कहिल्यै प्रयोग गर्दैनौँ । यस्तो अवस्थामा अत्यावश्यक नभएका एपहरू हटाएर स्टोरेज बढाउन सकिन्छ ।

– फोनको आन्तरिक स्टोरेजमा फोटो र भिडियोहरू राख्नुभएको छ भने यसलाई क्लाउडमा सार्न सक्नुहुन्छ । यसो गर्दा डाटा सुरक्षित रहन्छ र फोनको स्पेस पनि बढ्छ ।

–समय समयमा स्मार्टफोनको क्यासे डेटा र ब्राउजर हिस्ट्री क्लियर गर्नाले पनि फोनको स्पेसमा ठुलो प्रभाव पार्छ र स्टोरेज बढ्छ । फोनमा आफूलाई नचाहिने वा काम नलाग्ने भएका फाइलहरू डिलिट गरिदिनुस् ।

– फोनमा एसडी कार्ड स्पेस प्रदान गरिएको छ भने स्टोरेज बढाउन एसडी कार्ड प्रयोग गर्न सकिन्छ ।

– स्मार्टफोनको सेटिङमा गएर फोनलाई अप्टिमाइज गर्नुस् । पृष्ठभूमिमा चल्ने एपहरू बन्द गर्नुस् । स्वतः हुने डाउनलोड बन्द गर्नुस् र फोनबाट हाई रिजोल्युसनमा फोटो र भिडियोहरू सकेसम्म नलिनुस् ।

– फोन उत्पादन गर्ने कम्पनीहरूले समय समयमा फोनमा सफ्टवेयर अपडेटहरू पठाउँछन् । सधैँ नयाँ सफ्टवेयर अपडेट गर्नुस् ताकि स्टोरेज बढाउन सकियोस् ।

साभार: रातोपाटी https://www.ratopati.com/story/450451