राशनमा पाकेटको आँटा पाउनु माकपाको जित हो – तारा सुन्दास

डी.के.वाइबा, कालिमन्युज, कालेबुङ । पहाडको सम्पूर्ण राशन दोकानहरूमा माकपाको आन्दोलनपछि पाकेटको आँटा पाउन सकेको तारा सुन्दासले दाबी गरेका छन्। यसभन्दा अघि केवल समतल क्षेत्रका मानिसहरूलाई मात्र सरकारी राशनमा पाकेटको आँटा वितरण गर्ने कार्य भएपनि माकपाले पहाडका जनतालाई पनि समतल क्षेत्रका मानिसहरूकै समानान्तर पाकेटको आँटा वितरण गर्नुपर्ने माग गर्दै आन्दोलन गरेपछि आखिरमा पहाडका जनताले पाकेटको आँटा पाउन थालेको माकपा नेता सुन्दासले दाबी गरेका छन्। यसभन्दा अघि पहाडका जनतालाई बोरामा हुने आँटा वितरण गर्ने कार्य गर्दा बर्खाको समयमा उक्त आँटा पानीले भिजेपछि खान योग्यको नभएको कारण सरकारले पहाड अनि समतल क्षेत्रका मानिसहरूलाई समान व्यवहार गर्दै पाकेटको आँटा वितरण गर्ने माग गरेकै फलस्वरूप आखिरमा विभागले पहाडका जनतालाई पाकेटको आँटा वितरण गर्न थालेको सुन्दासको दाबी रहेको छ। उनले पाकेटको आँटा सरकारी राशन दोकानहरूमा वितरण गर्नु माकपाको जित रहेको भन्दै पहाडका जनताले अब स्वास्थ्य खाद्य खान पाउने बताएका छन्।

अर्कोतर्फ सुन्दासले सरकारी राशन दोकानहरूले पहाडका जनताली ठग्ने गरेको आरोप लगाउँदै सम्पूर्ण जनता पनि सचेत हुनपर्ने आह्वान गरेका छन्। उनले नियम अनुसार सम्पूर्ण मानिसहरूले 5 किलो आँटा 6 केजी चामल जनताले पाउनुपर्ने भएपनि कतिपय दोकानहरूले भने निर्धारित राशन जनताली नदिएको आरोप लगाएका हुन्। यसबारे राशन लिने जनता आफै सचेत बनेर निर्धारित राशन नदिए त्यस दोकान विरुद्ध सरकार समक्ष उजुरी गरेर कार्वाही गर्नुपर्ने आह्वान गरेका छन्।