नेवार विकास बोर्ड गठनका निम्ति मुख्यमन्त्रीलाई धन्यवाद

डी के वाइबा, कालिमन्युज, कालेबुङ 5 नोभेम्बर। नेवार विकास बोर्ड गठनको आधिकारीक सरकारी अधिसूचना जारी भएपछि आज कालेबुङ शहरमा नेवर युवा सङ्गठनले जुलुस निकालेर पश्चिम बङ्गाल सरकारप्रति आभार प्रकट गरेको छ। 

गत 19 अक्टोबरका दिन पश्चिम बङ्गालको पछौटे कल्याण विभागले नेवार विकास बोर्ड गठनको आधिकारीक सरकारी अधिसूचना जारीगरेपछि नेवार युवा सङ्गठनले पहिलोपल्ट शरमा जुलुस निकालेर मुख्यमन्त्री ममता ब्यानर्जी अनि पश्चिम बङ्गाल सरकार प्रति धन्यवाद ज्ञापन गरेको हो। कालेबुङको टाउन हल परिसरबाट निकालिएको उक्त जुलुसले मेनरोड, डम्बर चौक हुँदै शहर परिक्रमा गरेको थियो भने जुलुस अवधि नेवार समुदायका मानिसहरूले ममता ब्यानर्जी धन्यवादका नाराबाजी समेत लगाएका थिए। 

जुलुसले शहर परिक्रमा गरिसकेपछि महकुमा अधिकारीको कार्यलयमा पुगेर महकुमा अधिकारीको अनुपस्थितिमा डेपुटी म्याजिस्ट्रेट दिवेन्दु दास मार्फत मुख्यमन्त्री ममता ब्यानर्जीलाई आभार पत्र चढाएका थिए। यसक्रममा नेवार युवा सङ्गठनका सचिव रवी प्रधानले जानकारी दिँदै नेवार विकास बोर्डले सम्पूर्ण नेवार जातिको विकास हुने दाबी गर्दै राज्यकी मुख्यमन्त्री ममता ब्यानर्जीलाई धन्यवाद दिएका छन्। 

‘मुख्यमन्त्री ममता ब्यानर्जीले नेवार जातिको उत्थानका निम्ति विकास बोर्ड गठन गरेर नेवार जातिको समस्यालाई बुझिदिएका छन्। हामी यस विकास बोर्डको माध्यमबाट नेवार जातिको भाषा, साहित्य र संस्कृतिको विकास गर्नेछौँ’ रवी प्रधानले भने। यसक्रममा नेवार युवा सङ्गठनका अध्यक्ष विमल प्रधानले चाढैँ कोलकोता गएर मुख्यमन्त्रीलाई आभार प्रकट गर्ने जानकारी दिएका छन्।