त्रीपक्षीय बैठक पछि जन मजदुर सङ्गठनको धर्ना प्रदर्शन स्थगित

डी.के.वाइबा, कालिमन्युज, कालेबुङ, 9 सितम्बर । सन् 1970 देखि ग्रेफ अधिनस्थ कार्य गर्दै आइरहेका जापको भातृ सङ्गठन हाइवे जनमजदुर सङ्गठनले आजदेखि धर्ना प्रदर्शन स्थगित गरेको छ। 

राष्ट्रिय राजामार्ग 10 अधिनस्थ रम्फुदेखि सेभोकसम्म लगभ 9 सय भन्दा अधिक मजदुरहरूले राजमार्गको जिम्मेवार पीडब्ल्युडीले लिएपछि ग्रेफकै नियम अनुसार रोजगार पाउनुपर्ने माग गर्दै गत 6 सितम्बर देखि कालिझोडा स्थित पीडब्ल्युडीको कार्यालय अघि धर्ना प्रदर्शन गर्दै आइरहेको थियो। सोहि धर्नाकै क्रममा बिहिबार दार्जिलिङ जिल्लापाल अनुराग श्रीवास्तवले आज यहाँको महकुमा अधिकारीको कार्यालयमा बैठक डाकेपछि उक्त धर्ना बैठकको निम्ति स्थगित गरेको थियो। 

दार्जिलिङ जिल्लापाल अनुराग श्रीवास्तव, जिल्ला पुलिस अधिक्षक अमित पी जावल्गी, महकुमा अधिकारी निर्मलय घरामी, पीडब्ल्युडी हाइवे डिभिजनका सह अभियन्ता उत्तम प्रधान, जन आन्दोलन पार्टी अध्यक्ष डा. हर्कबहादुर छेत्री माझ बसेको बैठक पछि जन मजदुर सङ्गठनले उक्त धर्ना अनिश्चित कालिन स्थगित गरेको छ। बैठकपछि पत्रकारहरूलाई सम्बोधन गर्दै दार्जिलिङ जिल्लापाल अनुराग श्रीवास्तवले बैठकमा जन मजदुर सङ्गठनले रोजगारको निम्ति गर्दै आइरहेको मागबारे चर्चा परिचर्चा गरेपछि राष्ट्रिय राजमार्गको संवेदनशीलतालाई ध्यानमा राखेर हाल उनीहरूको धर्ना प्रदर्शन स्थगित गर्ने अनुरोध गरेको जनाए। 

यसक्रममा ग्रेफले राष्ट्रिय राजमार्ग पीडब्ल्युडीलाई हस्तान्तरण गरेपछि बेरोजगार बनेका श्रमिकहरूलाई पीडब्ल्युडी विभाग अधिनस्थ रोजगार दिनुपर्ने विषयमा जिल्लापालले रोजगारको निम्ति पीडब्ल्युडी विभागलाई अनुरोध गर्ने भएको जिल्लापाल श्रीवास्तवले जानकारी गराए। 

‘बैठकमा रोजगारको माग गरिरहेका श्रमिकहरूलाई पीडब्ल्युडी विभाग अधिनस्थ रोजगार दिन नसक्ने कुराको जानकारी गरायौँ। ग्रेफले जुन प्रकारले मजदुरहरूलाई रोजगार दिने गर्थ्यो त्यहीँ प्रकारले पीडब्ल्युडीले रोजगार दिन सक्दैन। किनभने पीडब्ल्युडीले राजमार्गमा ठेकादारहरू लगाएर कार्य गर्ने गर्दछ। यसकारण ग्रेफ अधिनस्थ कार्य गर्दै आएका मजदुरहरूलाई रोजगार दिनका निम्ति हामी ठेकादारहरूलाई अनुरोध गर्नेछौँ। यध्यपी हामी उनीहरूलाई कुनै चाप दिन भने सक्दैनौँ’ जिल्लापाल अनुराग श्रीवास्तवले भने। 

बैठकमा ग्रेफ अधिनस्थ कार्य गर्दै आइरहेका श्रमिकहरूलाई ग्रेफले पीडब्ल्युडी विभागलाई हस्तान्तरण गर्न अघि रोजगार दिनुपर्ने पत्र दिएको डा. हर्कबहादुर छेत्रीले राखेपछि उक्त पत्रको आधारमा जिल्लापालले पीडब्ल्युडी विभागमा पहल गर्ने बताएका छन्। यसबारे आफुहरूले निर्णय गर्न नसक्ने भएको कारण विभागले जे निर्देश दिनेछ सोहि अनुरूप कार्य गर्ने जिल्लापालले बताएका छन्। 

सोहिक्रममा यता जाप अध्यक्ष डा. हर्कबहादुर छेत्रीले पनि बैठकपछि पत्रकारहरूलाई सम्बोधन राष्ट्रिय राजमार्गमा कार्यरत रहेका मजदुरवर्गको समस्या समाधानको निम्ति आफुहरूले धर्ना प्रदर्शन गरेपछि मात्रै प्रशासनको ध्यान आकर्षण भएको कारण आज बैठक डाकेको बताए। बैठकमा पीडब्ल्युडी अधिनस्थ काम गर्ने ठेकादारहरूले हाल बाहिरबाट मजदुरहरू ल्याएर काम लगाउँदै आएको अनि त्यस क्षेत्रमा अघिबाटै काम गर्ने मजदुरहरूलाई भने रोजगार नदिएको विषयका कुरा उठान गरेको बताए। 

यसक्रममा जिल्लापालले पुन: अर्को बैठक बोलाएर त्यस बैठकमा ठेकादारहरूलाई समेत बोलाएर जुन ठाउँमा काम हुनेछ त्यहाँ अघिबाटै काम गर्दै आएका मजदुरहरूलाई रोजगार दिनुपर्ने विषयमा अनुरोध गर्ने कुरा भएको डा. छेत्रीले पनि बताएका छन्। 

अर्कोतर्फ ग्रेफले श्रमिकहरूको समस्या समाधानको निम्ति पीडब्ल्युडी विभागलाई दिएको पत्रको आधारमा जिल्लापालले सरकारलाई बताएर काम गर्ने आश्वासन दिएको पनि छेत्रीले जानकारी गराएका छन्। सोहि बैठक पछि वर्षाको मौसम अनि मुख्यमन्त्री ममता ब्यानर्जीको पहाड भ्रमणलाई ध्यानमा राखेर अहिलेलाई उक्त धर्ना प्रदर्शन स्थगित राखेको जानकारी दिएका छन्।