कालेबुङ जिल्लाको मागमा जुट्यो जनताको भीड .... नोभेम्बरमा मुख्यमन्त्रीले जिल्ला घोषणा गरे दिसम्बरदेखि कालेबुङवासी आफ्नो जिल्लामा हुनेछन् – डा. हर्कबहादुर

डी.के. वाइबा, कालिमन्युज, कालेबुङ 16 अक्टोबर। ‘आगामी नोभेम्बर महिनामा दिदी कालेबुङ आउँदैछिन्। उनले कालेबुङ भ्रमणमा आउँदा छुट्टै जिल्लाको घोषणा गरे दिसम्बर महिनादेखि कालेबुङका जनता आफ्नै जिल्लाभित्र हुनेछन्’- उक्त कुरा कालेबुङका विधायक डा. हर्कबहादुर छेत्रीले भनेका हुन्।

गोर्खा जनमुक्ति मोर्चा पार्टीबाट राजीनामा दिएर छुट्टै जिल्लाको मुद्दालाई अघि बढाउँदै आइरहेका डा. छेत्रीले आज पहिलोपल्ट कालेबुङका जनतालाई जिल्लाको मागमा सम्बोधन गरेका हुन्। ‘जिल्ला माग समिति’-को आयोजनामा यहाँको थाना डाँडा परिसरमा सम्पन्न भएको उक्त जनसभामा डा. हर्कबहादुर छेत्री प्रमुख वक्ताका रूपमा उपस्थित रहेका थिए। यस अवसरमा कालेबुङ जिल्लाको समर्थनमा विभिन्न स्थानहरूबाट धेरै मात्रमा मानिसहरूको भीड जमेको थियो। विभिन्न जात गोष्ठिका प्रतिनिधीवर्गको विशेष उपस्थित रहेको उक्त जनसभामा मानिसहरूले ‘हर्कबहादुर छेत्री जिन्दावाद ! कालेबुङ जिल्ला बनाउनै पर्छ’ जस्ता नाराबाजी समेत लगाएका थिए। यसक्रममा उक्त जनसभालाई ईल्टा अध्यक्ष दोर्जी टी लेप्चा, तामाङ युवा संगठनका वसन्त कुमार तामाङ, खस जनजाति संघका सिबु छेत्री, ईमी संगठनका लेन्डुप भोटिया, याकथुङ सुम चुम्भोका भवानी सुब्बा, अनुसूचित संगठनका गंगासागर पञ्चकोटि, युनाइटेड फोरमका एल.एम शर्मा, विशाल राई टिस्टे, बिनोद पराजुली आदिले सम्बोधन गरेका थिए। जिल्ला मागबारे कालेबुङका जनतालाई डा. हर्कबहादुर छेत्रीले प्रथमपल्ट सम्बोधन गर्ने क्रममा उनले गोर्खा जनमुक्ति मोर्चाका नेताहरू प्रति कटाक्ष गर्न समेत चुकेनन्।

यसक्रममा जिल्ला गठनको औचित्यबारे प्रकाश पार्दै डा. छेत्रीले कालेबुङ छुट्टै जिल्ला भएको खण्डमा कालेबुङका जनतालाई आर्थिक, सामाजिक, प्रशासनिक लाभ हुने दाबी गरेका छन्। भारत सरकारले क्षेत्रको बिकास कार्य गर्न जिल्लाको आधारमा आर्थिक राशी दिने गरेको बताउँदै यदि कालेबुङ छुट्टै जिल्ला भए उक्त जिल्ला बिकासको राशी सोझै कालेबुङले पाउने अनि कालेबुङवासीले दार्जीलिङबाट बिकासको अपेक्षा साँचेर बस्नुपर्ने आवश्यक्ता नरहेको दाबी गरे। उनले कालेबुङ छुट्टै जिल्ला भए यहाँ तीनवटा खण्ड बढोत्तरी भएर तीन महकुमा अनि 42 वटा ग्राम पञ्चायत बढोत्तरी भएर 126 वटा बनिने दाबी गरेका छन्। यसबारे आफूले मुख्यमन्त्री ममता ब्यानर्जीलाई अघिबाटै अवगत गराएको पनि विधायक छेत्रीले जानकारी गराए।

‘जनतालाई पहिला बिकास चाहिएको छ। बिकासले नै राज्य निर्माणका पूर्वाधारहरू हुन्छ। आज जिल्ला निर्माणको कुरा गर्दा जाति टुक्रिन्छ भन्ने आरोप लगाउँदैछन्। चिन्हारी मुद्दा दबाउने षढयन्त्र रच्यो भन्दैछन्। यहाँ जसले जाति टुक्रिने अनि चिन्हारीको मुद्दा दबाउने षढयन्त्र भयो भन्दैछन् उनीहरूको थालभरी भात छ। ब्याँक ब्यालेन्स पर्याप्त छ। थालमा पूर्ण भात अनि धेरै ब्याँक ब्यालेन्स भएकाहरूले यस्तो आरोप लगाउन अघि जनताको बिकास गर्नुपर्छ’ – विधायक छेत्रीले मोर्चा नेताहरूलाई कटाक्ष गर्दै भने। आफूलाई घरमा जनता भेटघाट गर्न आउँदा कसैले छुट्टै राज्य गोर्खाल्याण्ड बारे सोध्ने नगरेको बताउँदै उनीहरूले केवल आफ्नो गाउँको फूटपाथ, स्कूल निर्माणका कुराहरू राख्ने गरेको बताए।

यसैक्रममा उनले भने - ‘जनतालाई बिकास चाहिएको छ कि राज्य ? यसबारे नेता स्पष्ट हुनपर्छ। राज्य बनिन अघि सबै पूर्वाधारहरू तयार भएको हुनपर्छ। पूर्वाधारहरू तयार पार्ने कुरा गर्दा उनीहरू पत्तै दिँदैनन्।’ यसक्रममा गोजमुमोले छुट्टै जिल्लाको माग आफूले खोसेको आरोप लगाएको बताउँदै ‘एक्लो हर्कबहादुर छेत्रीले केही गर्न सक्दैन। तिमीहरूसित 4 वटा नगरपालिका छ अनि 45 जना सभासदहरू छन्। यत्रो वर्चस्व भएकाहरूलाई एक्लो हर्कबहादुर छेत्रीले खोस्यो भन्छ भने तिमीहरू हर्कबहादुर छेत्री भन्दा पनि लिखुरे छौ’ छेत्रीले मोर्चालाई आक्रमण गर्दै भने।

जनसभालाई सम्बोधन गर्ने क्रममा डा. छेत्रीले मोर्चा अध्यक्ष विमल गुरुङलाई आक्रमण गर्न पनि पछि परेनन्। यसक्रममा आफूले गोजमुमो पार्टीबाट राजीनामा दिएपछि मोर्चाले पुराना भिडियो क्लिपहरू देखाएर आफ्नो अझ प्रचार गर्ने कार्य गरेको बताउँदै यदि आफूले भिडियो क्लिप देखाउन परे त्यसको परिणाम मोर्चाको निम्ति घातक हुने बताएका छन्। ‘मोर्चाका साथीहरूले मैले पार्टीबाट राजीनामा दिँदा जनतालाई धोका दिएको भन्दै पुराना भिडियो क्लिपहरू देखाउँदैछन् यदि मैले पुरानो भिडियो क्लिप देखाउनु हो भने 10 मार्च 2010 पछि त विमल गुरुङ फोटोमा खदा लगाएर भित्तामा झुण्डिएको हुनुपर्ने हो’ – डा. छेत्रीले विमल गुरुङलाई कटाक्ष गर्दै भने। उनले पैदल यात्रा हिँढेर छुट्टै राज्य प्राप्त हुन नसक्ने दाबी गर्दै ‘यदि पैदल यात्रा गर्दा छुट्टै राज्य हुन्छ भने म एक्लै एक हजार किलोमिटर पैदल यात्रा गर्नेछु’ भने।

भारतमा अङ्ग्रेजहरूको विरुद्धमा गाँधीजीले गरेको पदयात्रा मात्र खाँट्टी पदयात्रा भएको दाबी गर्दै ‘विमल गुरुङको पद यात्रा पद बँचाउने यात्रा हो’ भने। यसक्रममा उनले राज्य गठनले जनताको आर्थिक उन्नती हुने दाबी गर्दै जिल्ला गठनले आर्थिक स्वाधिनता हुने दाबी गरे। आफूहरूले जिल्ला गठनको निम्ति खाका तयार पारेको बताउँदै बाघपुल उता हाईवे क्षेत्रको सम्पूर्ण देब्रे भागहरू कालेबुङ जिल्लाभित्र अन्तरभुक्ति हुनुपर्छ भनि मुख्यमन्त्रीलाई अनुरोध गरेर यसको औचित्यबारे दस्तावेजहरू बुझाउने बताएका छन्। राजनीति गर्नेहरूले जनतालाई सुविधा दिनसक्नुपर्ने बताउँदै जनतालाई सुविधा दिनकै निम्ति आफूले जिल्लाको मुद्दा अघि सारेको बताए। यसक्रममा कालेबुङका जनताले जिल्ला निर्माणको मागमा पूर्ण सहयोग गर्ने बताउँदै भविष्यमा जनताको समर्थन दिनो दिन बढेर जाने दाबी पनि गरे। ‘राजनीति गर्नेहरूले भावनाको कुरा गर्नुहुँदैन। यहाँ भावनाको कुरा मात्र गर्दैछ। जनतालाई जे चाहिएको छ त्यो दिने काम राजनीति गर्नेहरूको हो’ छेत्रीले भने।

आफ्नो सम्बोधनमा उनले भारतीय जनता पार्टी छुट्टै राज्य गोर्खाल्याण्डको मुद्दामा कहिल्यै ईमान्दार नरहेको दाबी गरे। उनीहरू ईमान्दार भएको हुँदो हो भने लोकसभामा गोर्खाल्याण्डको बिल ल्याउने थियो भन्दै ईमान्दार नभएकै कारण आजसम्म केही कार्य नगरेको तिनले आरोप लगाए। यसक्रममा मोर्चाले अघि बढाईरहेको आन्दोलनले पनि लक्ष्य प्राप्त गर्न नसक्ने ठोकुवा गरेका छन्। मोर्चाले जाति विभाजनको कुरा गरिरहेको सन्दर्भमा बोल्दै ‘एउटा जातिलाई बाहिरका व्यक्ति आएर कहिलै टुक्राऊन सक्दैन। यदि कसैले टुक्राउँदा टुक्रिन्छ भने त्यो जाति वासत्वमा जाति भएकै छैन’ छेत्रीले भने। उनले जिल्ला निर्माणको निम्ति आफूले भिजन राखेको बताउँदै मोर्चाभित्र भिजन नभएका नेताहरूले कार्यक्रम तयार पार्ने गरेकै कारण बारम्बार समस्या सिर्जना हुने गरेको जनाए। यसक्रममा उनले राज्यका मुख्य सचिवले जीटीएलाई 50 वटा जुनियर हाई स्कूल अनि 88 वटा प्राथमिक पाठशाला निर्माणको निम्ति प्रस्ताव पठाएको बताउदै यसबारे जीटीएले केही कार्य नगरेको अनि पत्रको जवाब समेत नलेखेको आरोप लगाएका छन्। ‘वास्तवमा हाम्रो दुशमन राज्य होइन। हाम्रो दुश्मन हामी भित्रै छन्’ डा.छेत्रीले भने।