टिस्टा खेलकूद समितिको सभा सम्पन्न

डी के वाइबा, कालिमन्युज, कालेबुङ 14 जुलाई 2015। बिगत वर्षहरूझैँ यसवर्ष पनि टिस्टा खेल मैदानमा टिस्टा खेलकूद समितिको आयोजनामा 69 औँ स्वतन्त्र दिवस पालन गरिने भएको छ। सोही विषयलाई लिएर टिस्टा खेलकूद समितिको एक सभा सम्पन्न भएको थियो। उक्त सभामा क्षेत्रका विभिन्न संघ संस्थाका प्रतिनिधीवर्ग उपस्थित रहेका थिए। 

टिस्टा सार्बजनिक भवनमा आयोजित उक्त सभालाई समितिकै अध्यक्ष ललीत छेत्रीले अध्यक्षता गरेका थिए। यस अवसरमा केही दिन अघि सडक दुर्घटनाको कारण मृत्यु भएका रामकृष्ण शिक्षा परिषदका प्रधान अध्यापक बसन्त राई अनि प्राकृतिक आपदा भलपैह्रोको कारण स्वर्गवास भएका सम्पूर्ण मानिसहरूको मृत आत्माको शान्तिको कामना राख्दै मौन धारण गरिएको थियो। 

उक्त सभामा स्वतन्त्र दिवस कार्यक्रम आयोजनाको निम्ति विभिन्न संघ संस्थाका प्रतिनिधीवर्गलाई लिएर उपसमिति गठन गरिएको छ। स्वतन्त्र दिवस कार्यक्रमलाई रोचक अनि स्तरीय बनाउन लागीपरेको समितिको आयोजनामा आगामी 24 जुलाईदेखि स्वतन्त्र दिवस फूटबल खेल सम्पन्न गरिने पनि सभामा तय गरिएको छ। उक्त जानकारी समितिको पक्षमा सचिव सन्तोष प्रधानले प्रेस बिज्ञप्ति जारी गरि दिएका छन्।