मङपू गोजमुमो कार्यालयमा तृणमूल कार्यकर्ताहरुको हमला

डी के वाइबा, कालिमन्युज, मङ्पू 19 मई। मङ्पू स्थित गोर्खा जनमुक्ति मोर्चाको पार्टी कार्यलयमा आज बिहान तृणमूल काङ्ग्रेस कार्यकर्ताहरुले हमला गर्दा मोर्चा कार्यकर्ता अदिप तामाङको खुट्टा भाँच्चिएको छ भने एकजना सामान्य घाईते भएका छन। 

जानकारी अनुसार आज बिहान लगभग् आठ बजेतिर मोर्चा कार्यकर्ता अदिप तामाङ अनि केवल ठकुरीले गोजमुमो पार्टी कार्यलय खोलेर बसेका थिए। यसरी पार्टी कार्यलय खोलेर बसेका समयमा साढे नौ बजेतिर अचानक केही तृणमूल कार्यकर्ताहरु सोझै मोर्चा कार्यलयमा पसेर हमला गर्दा अदिप तामाङको एउटा खुट्टा भाँचिएको छ भने केवल ठकुरी समान्य घाईते भएका छन। उनीहरुले मोर्चाको पार्टी कार्यलय पनि तोडफोड गरे। धेरै संख्यामा आएका तृणमूल कार्यकर्ताहरुले धारिलो हतियार, रड आदि हातियारहरु बोकेको आरोप लागेको छ। घाईते भएका अदिप तामाङलाई मोर्चाकै पार्टी कार्यलयमा पहिला धारिलो हतियारले प्रहार गरेको थियो भने तिनी उक्त प्रहारबाट बाँच्न सक्षम भएका थिए। यद्यपी व्यापक संख्यामा तृणमूल कार्यकर्ताहरु पसेर आक्रमण गर्दा तिनको खुट्टा भाँचिएको छ भने शरिरको बिभिन्न भागहरुमा चोटपटक लागेको छ। 

यसरी अचानक मोर्चाकै कार्यलयमा पसेर तृणमूल काङ्ग्रेस कार्यकर्ताहरुले हमला गरेको घटना चारैतिर फैलिएपछि मङपू क्षेत्रमा सनसनी मच्चिएको थियो। घटनाबारे चारैतिर हल्ला फैलिए पछि चारैतिरबाट मोर्चा कार्यकर्ताहरु सडकमा निस्किएका थिए भने सम्पूर्ण दोकानपाटमा अघोषित बन्द भएको थियो। उक्त घटना पछि तत्काल पुलिसबल घटनास्थलमा तैनाथ भएको कारण दुई दलमाझ थप संघर्ष हुन पाएन। 

घटनालाई केन्द्र गरेर मानिसहरुमा आक्रोश बडेपछि आरोपीहरुलाई तत्काल पक्राऊ गर्नुपर्ने माग गर्दै मङ्पू क्षेत्रमा गोजमुमो पार्टी कार्यकर्ताहरुले एउटा प्रतिवाद र्‍याली निकालेको थियो। उक्त प्रतिवाद र्‍यालीले बजार परिक्रमा गरेपछि मङ्पू पुलिस आउटपोष्टमा लगभग दुईघण्टासम्म घेराऊ गरेर प्रदर्शन गर्दै आरूपीहरुलाई यथाशिघ्र पक्राऊको माग गरे। उक्त घटनाले आक्रोशित बनेका मानिसहरुले मङ्पू देखी सिलगडी जाने सवारी वाहन डब्ल्यु बी 76-7723 वाहन पनि तोडफोड गरे। 

घटनाबारे यता मङ्पू पुलिस आउटपोष्टमा तृणमूल कार्यकर्ताहरु क्रमैले निलकुमार गुरुङ, पवन बल, के एल छेत्री, मिरेन लामा, सरद थापा, यादव गुरुङ अनि अन्य बिरुद्ध प्रार्थमिकी दर्ता गरिएको छ। घटनामा संलग्न रहेका आरोपीहरुलाई मोर्चाले साँझ छ बजेभित्रमा पक्राऊ गर्नुपर्ने पुलिस प्रशासनलाई अल्टिमेटम दिएको छ भने यदि पक्राऊ नगरे सम्पूर्ण सिन्कोना बगान बन्द गर्ने चेतावनी दिएको छ। आफूहरु पार्टी कार्यलयमा बसिरहेको समयमा तृणमूल कङ्ग्रेसका युवाहरु धारिलो हतियार् बोकेर पार्टी कार्यलयमा अचानक् पसेर हमला गरेको घाईते अदिप तामाङले बताएका छन। 

“हामी बिहान पार्टी अफिस खोलेर बसिरहेका थियौँ। अफिसमा बसीरहेको समयमा अचानक तृणमूल समर्थकहरु नाराबाजी गर्दै आए पछि सोझै हामीलाई धारिलो हतियारले हमला गरेको हो” अदिप तामाङले भने। घटनामा घाईते भएका तामाङलाई मङ्पू अस्पतालमा प्राथमिक उपचार गरेर दार्जीलिङ रेफर गरिएको छ। यता उक्त घटनाबारे गोजमुमो पार्टीको भातृसंगठन दार्जीलिङ तराई डुवर्स प्लान्टेसन लेबर युनियनका महासचिव गगन राईले तृणमूल कार्यकर्ताहरु अचानक एक सवारी अनि दुई भ्यान वाहनमा आएर सोझै गोजमुमो पार्टी कार्यलयमा पसेर हमला गरेको आरोप लगाए। 

“तृणमूल कार्यकर्ताहरुले अचानक हतियारहरुले हमला गर्दा अदिप तामाङको खुट्टा भाँच्चिएको छ। यस अवधी पार्टी कार्यलयबाट दुई लाख नगद रुपीया चोरी भएको छ” गगन राईले भने। यसका साथै यस अवधी पार्टी कार्यलयमा भएका केवल ठकुरीको बाईकको सम्पूर्ण कागजपत्र अनि मणीपर्स हराएको पनि तिनले बताए। घटनाको कारण आक्रोशित मानिसहरुले तोडफोड गरेको वाहनका मालिक संजय थापाले आफ्नो वाहन सदा झै मङ्पूबाट सिलगडी जानको निम्ति आफ्ना यात्रीहरुलाई लिन रेशेप बजार गईरहेको समय बाटोमा झगडा भईरहेको देखे पछि वाहनलाई घरमा ल्याएर राखेको बताए। 

यसैक्रममा आक्रोशित मानिसहरुले वाहन तोडफोड गरेको तिनले बताएका छन। घटनाबारे पुलिसले आरोपीहरुलाई खोजी अभियान गरे पनि समाचार लेखुँजेलसम्म कसैलाई पक्राऊ गरेको छैन। 

अर्कोतर्फ एकजना तृणमूल कङ्ग्रेसका कार्यकर्ताले आफ्नो नाउँ प्रकाशित नगरिदिने सर्त राख्दै आईतबार राती अज्ञात मानिसहरुले तृणमूल कार्यलयमा लगाईएको पार्टीको झण्डा निकालेर जलाएको थियो। बिशेष आईतबार मङ्पूमा गोजमुमो पार्टीले बिजय उत्सव पालन गरेको कारण उक्त झण्डा मोर्चाले नै निकालेर जलाउँने कार्य गरेको हुनसक्ने सबैले अनुमान गरेका थिए। 

यता झण्डा जलाईएको घट्ना बिहान तृणमूल कार्यकर्ताहरुले थाह पाए पछि सबै आक्रोशित बनेर पार्टी कार्यलय पुगेको तिनले जनकारी गराए। यसरी दुईदलमाझ संघर्षको घटना सृजना भएको तिनले बताएका छन।