गोर्खा राष्ट्रिय मुक्ति मोर्चाले पहाडमा आफ्नो अस्तित्व रहेको प्रमाण देखायो

डी के वाइबा, कालिमन्युज, कालेबुङ 15 मार्च 2014 । छैटौँ अनुसूचीको मुद्दाले पहाडमा आफ्नो 21 वर्षे शाषण गुमाएको गोर्खा राष्ट्रिय मुक्ति मोर्चाले लोकसभा चुनावलाई केन्द्र गरेर पुन: छैटौँ अनुसूचीकै सहारा लिँदै पहाड भित्रिने कार्य आरम्भ गरेको छ। यसैक्रममा गोरामुमो पार्टीले आज आफ्नो उपस्थिति पहाडमा अझै पनि छ भन्ने प्रमाण देखाएको छ। गोरामुमो कालेबुङ शाखाले आज यहाँको टाउन हलमा एक अन्तरक्रिया कार्यक्रम गरेर पहाडमा पार्टीको अस्तित्व रहेको प्रमाण देखाएको छ। यस अवसरमा कालेबुङका 11 भिलेज चिफ कमिटिका सदस्य अनि पार्टी कार्यकर्ताहरु उपस्थित बनेका थिए।

कालेबुङ महकुमाको बिभिन्न स्थानहरुबाट पहाडमा गोजमुमो पार्टीको उदय पछि पहिलोपल्ट आज कालेबुङ्मा खुल्ला रुपले गोरामुमो पार्टी कार्यकर्ताहरु पार्टीको झण्डा बाहनमा लगाएर टाउन हलसम्म आईपुगेका थिए। यसअवसरमा राजनैतिक झडप हुने सम्भावनालाई केन्द्र गरेर टाउनहल परिसरमा सीआरपी तैनाथ गरिएको थियो। गोरामुमो कालेबुङ महकुमा समितिका सल्लाहकार दिपंकर लामाको अध्यक्षतामा सम्पन्न उक्त कार्यक्रममा कालेबुङ महकुमा समितिका अध्यक्ष मौरिस कालिकोटे, सचिव संजय लामा, सहसचिव अनिल लोपचन, गोरानामो सल्लाहकार गायत्री मुखिया लगायत बिभिन्न भिलेज चिफहरु उपस्थित बनेका थिए।

यस अवसरमा कार्यक्रमलाई सम्बोधन गर्दै वक्ताहरुले छैटौँ अनुसूचीले मात्र पहाडवासीको समस्या समाधान हुने दाबी गरे। वक्ताहरुले गोजमुमो पार्टीको नाउँ नलिई जोडदाएर आलोचना गर्दै गोरामुमो अध्यक्ष सुवास घिसिङ मात्र ईमान्दार नेता रहेको दाबी पनि गरे। गोरामुमो कालेबुङ महकुमा समितिका अध्यक्ष मौरिस कालिकोटेले गत छ वर्ष यता पार्टीका कार्यकर्ताहरु माझ कुनै भेटघाट नरहेको कारण आज यसरी पार्टीको कार्यक्रमहरु जानकारी गराउँन नै कार्यकर्ताहरुमाझ भेटघाटको कार्यक्रम गरेको बताए। तिनले गोरामुमो पार्टीको एकमात्र छैटौँ अनुसूचीको मुद्दा रहेको बताउँदै यसलाई सरकारले यथाशिघ्र पारित गर्नपर्ने माग गरे। 

कालेबुङमा दलको पुनर्गठन गरिएपछि यो पहिलो ठूलो राजनैतिक कार्यक्रम थियो। गोरामुमोको महकुमा समितिका अध्यक्ष मौरिश कालीकोटे, रोशन लामा, सहसचिव अनील लोप्चन, सञ्जय लामा, तारामणि छेत्री आफ्नो सम्बोधनको क्रममा केही आक्रमक देखिए भने अब हत्या र हिंसाको राजनीति नदोहोरिने प्रतिश्रुति पनि दिइरहेका थिए।

सम्बोधनको क्रममा मौरिस कालिकोटेले अब शहरी अनि ग्रामिण दुवै क्षेत्रहरूमा दलको विस्तार र सुदृढिकरणको निम्ति द्रुत गतिमा काम गर्न आफ्ना कार्यकर्ताहरूलाई निर्देश दिए। ‘पहाडको राजनीतिमा अब हामीले आफ्नो पुनरागमनको दह्रो सन्देश दिन सक्नुपर्छ। हाम्रो दलले जनतालाई राजनैतिक दिशा र सुरक्षा दिन सक्छ भन्ने विश्वास दिलाउनपर्छ’ कालीकोटेले भने। यता, महकुमा समितिका सहसचिव अनील लोप्चनले छैटौं अनुसुचीको व्यवस्थाले नै राज्यप्राप्तिको लक्ष्य सुनिश्चित गर्ने दाबी गरे। ‘

दार्जीलिङ पहाडको खजमजिएको ऐतिहासिक र भौगोलिक पृष्ठभुमिको अध्ययन गर्दा गोर्खाल्याण्ड सम्विधानको धारा 3(क) को आधारमा होइन तर छैटौं अनुसूचीको मार्गबाट नै प्राप्त हुनेछ’ तिनले पहाडमा छैटौं अनुसूची लागू हुँदा बङ्गाल विभाजन हुने स्पष्ट सङ्केत पाएपछि नै तत्कालिन वाममोर्चा सरकारले नयाँ राजनैतिक शक्ति स्थापित गरेर यो मुद्दालाई षडयञ्त्रपूर्वक ओझेलमा पार्ने काम गरेको आरोप पनि लगाए। ‘हाम्रो मान्छेले त्योबेला कुरा नबुझि विरोध गर्यो्। वास्तवमा वाममोर्चा सरकारले वुद्धिजीवि खेताला र आफ्नो एजेण्टहरू लगाएर यसको विरोध गर्ने बातावरण तयार पारेको थियो’ लोप्चनले भने।

तिनले छैटौ अनुसुचीले सिङ्गो गोर्खाजातिलाई विभाजन गर्छ भन्ने तर्कलाई पनि भ्रान्तिपूर्ण तरिकाले प्रचार गरिएको बताए। तिनले आफ्नो नेताले 1931-को जनगणनाको आधारमा पहाडका सम्पूर्ण जातगोष्ठीलाई जनजातिको दर्तासँग छैटौ अनुसुचीको माग गरेको कारण जातिविभाजनको प्रश्नै नउठने दाबी गरे। गोरामुमो नेता रोशन लामाले गोर्खाल्याण्डको नाममा नेताहरूले गरेको कार्यले गोर्खाहरूको कालो इतिहास लेखिएको बताउँदै गोरामुमोले अब सुनौलो इतिहास लेख्ने तयारी गरेको बताए। ‘छैटौं अनुसूची सम्वैधानिक सुरक्षा भएको व्यवस्था हो। यसले सर्वभारतका गोर्खाहरूलाई पहिचान प्रदान गर्छ’ लामाले भने।