अरुसंग लडौ आफैहरु नलडौ – बिमल गुरुङ

डी के वाइबा, कालिमन्युज, कालेबुङ, 17 नोभेम्बर 2013। “सबैले अध्यक्ष नै जीटीए चिफ बस्नुपर्छ भन्दैछन। अब हस्तक्षेप नै गर्नुपर्ला जस्तो लाग्दैछ” उक्त कुरा गोजमुमो अध्यक्ष बिमल गुरुङले आज मेला ग्राउण्डमा आयोजित जनसभालाई सम्बोधन गर्दै भनेका हुन।
अहिलेघरी जीटीएलाई डिपुटी चिफ कर्णल रमेश आले अनि अन्य सभासदहरुले सञ्चालन गरिरहेको भए पनि उनीहरुले सही प्रकारले चलाउँन सक्छन के भन्ने बिषयमा सोंचेर पुन: आफै जीटीए चिफ बन्न सक्ने सम्भावनालाई आफैले खुलाएका छन। मोर्चा अध्यक्ष बिमल गुरुङले आजको जनसभामा के भन्ने हुन भन्ने अनेकौ कौतुहलता जनमानसमा जागेको थियो।
दार्जीलिङ पहाडमा बडदो तृणमूल अनि गोरामुमो पार्टीको शक्तिलाई रोक्न तिनले कुन पदक्षेप ग्रहण गर्ने भन्ने बिषयमा सबै उत्सुक बनिरहेको समयमा आखिरमा मोर्चाले बिकाशकै माध्यमबाट जनताको मन जित्ने भएको छ। पहाडमा अहिलेघरी अन्य राजनैतिक पार्टीहरुको बिस्तारमा समेत रोक लगाउँन तिनले बिकाशकै बाटो चुनेको स्पष्ट बनेको छ। “म दुईवर्ष समय दिनेछु।
यत्तिका वर्षभित्रमा पहाडलाई स्वीजरल्याण्ड बनाउँनु” गुरुङले जीटीए डिपुटी चिफ कर्णल आले अनि अन्य सभासदहरुलाई ईंगित गर्दै भने। यस अवधी तिनले जीटीएको हातमा एकहजार करोड रहेको खुलासा गर्दै पहाडमा बिकाश कार्यहरु गरिने स्पष्ट पारे।
आफ्नो सम्बोधनको क्रममा बङगाल सरकारले लेप्चा बिकाश बोर्ड जसरी गठन गरेको छ त्यसरी नै अन्य जातिय गोष्ठिहरुका निम्ति पनि भिन्न भिन्नै बिकाश बोर्डहरु गठन गर्नुपर्ने तिनले बताए। यसैक्रममा लेप्चा भाषा दार्जीलिङ पहाडका सरकारी प्राथमिक पाठशालाहरुमा पठन पाठन गर्ने बिषयमा बोल्दै तिनले लेप्चा भाषा मात्र होईन अन्य भाषाहरु पनि पढाउँनुपर्ने माग गरे।
‘लेप्चा भाषाको पठनपाठन सरकारी प्राथमिक पाठशालाहरूमा हुन्छ भने अन्य गुरुङ, तामाङ, भोटिया आदिको भाषा पनि पडाउँनुपर्छ” बिमल गुरुङले भने। गुरुङले जनसभालाई सम्बोधन गर्दै जीटीएले दार्जीलिङ पहाडमा चारहजारजनालाई नियुक्ति गर्ने घोषणा गरेका छन।
“जीटीएको बिभिन्न बिभागहरुमा रिक्त पदहरु छन। उक्त रिक्त पदहरुमा चाँडै सबअर्डिनेट सेलेक्सन बोर्ड गठन गरेर चारहजारजनाको नियुक्ति गरिनेछ” बिमल गुरुङले स्पष्ट भने। जनसभालाई सम्बोधन गर्ने क्रममा मोर्चा अध्यक्ष बिमल गुरुङले पुलिस प्रशासनको भूमिका माथी पनि प्रश्न खडा गरे। बङ्गाल पुलिसको नीति ठिक नरहेको बताउँदै पुलिसले राजनीति गरिरहेको तिनले आरोप लगाए। यतिमात्र होईन तृणमूल कङ्ग्रेसको झण्डा समेत पुलिसले बोकेको आफू देखेको तिनले दाबी गरे। “अरुसंग लडौ आफैहरुमाझ नलडौ” तिनले तृणमूल अनि गोरामुमो माझ बिभाजन भएर एकार्कामा नलड्ने आह्वान समेत गरे।
‘म शान्ति चाहन्छु, मलाई झगडा मनपर्दैन। 44 महिनाको आन्दोलनमा पनि मैले अगणतान्त्रिक कार्य गरिन” तिनले भने। यसक्रममा तिनले दार्जीलिङ पहाडमा सीआरपीको काम केवल झण्डा रुग्नु मात्र भएको बताउँदै उनीहरुको यहाँ कुनै अरु काम नरहेको बताए।
तिनले अबको आन्दोलन दिल्लीमुखी हुने बताउँदै दिल्लीमा आगामी 13, 14 अनि 15 दिसम्बरको दिन हजारौंका सङ्ख्यामा भेला भएर कार्यक्रम गर्ने बताए। यता पुलिस प्रशासनले कुनै कार्यक्रम गर्न नदिएको गुनासो पोख्दै दिल्लीमुखी कार्यक्रममा नै ध्यान केन्द्रित गरेको बिमल गुरुङले बताएका छन।
तिनले आफ्नो सम्बोधनको क्रममा आन्दोलनको निम्ति गठन भएको सम्पूर्ण दलहरुको साझा संगठनका सदस्यहरुलाई कटाक्ष गर्दै अल पार्टी बैठक गर्दा अन्य दलहरुले आफ्नो शरीरको लुगा खोल्ने स्थितिमा पुर्‍याएको आरोप लगाए। यता तिनले आगामी 20 अनि 21 नोभेम्बरको दिन हुने वार्तामा जाने टोलीको नाउँ घोषणा गर्दै “वार्ताले जीटीएलाई हस्तक्षेप गर्नुहुँदैन भन्नुपर्छ” भने।
उक्त वार्ता टोलीमा महासचिव रोशन गिरी, डा. आरबी भुजेल अनि तिन विधायकहरू हुने बताएका छन।