जनताको नाउँमा पोस्टर गोजमुमो पार्टीले टाँसेको आरोप

डी के वाइबा, कालिमन्युज, कालेबुङ, 14 जनवरी 2016। कालेबुङ शहरमा आज बिहानै एका-एक जनताको नाउँमा पोस्टर टाँसिएको छ। जनताको नाउँमा उक्त पोस्टर कसले टाँसे भन्ने कसैलाई थाह भएको छैन। यद्यपी उक्त पोस्टर गोजमुमो पार्टीले टाँसेको जिल्ला माग समितिले आरोप लगाएको छ। 

जनताको नाउँमा टाँसिएको पोस्टरमा अलग राज्य गोर्खाल्याण्ड बिरोधी बङ्गालका दलालहरू डा. हर्कबहादुर छेत्री, डा. महेन्द्र पी. लामा, अमर लामा, अनमोल प्रसाद, युसुफ सिमिकसँग जनता होशियार हुनपर्ने आह्वान गरिएको छ। रातीको समयमा टाँसिको पोस्टर बिहान मानिसहरूले देखेपछि शहरमा एकएक हल्ला मच्चेको हो। उक्त पोस्टर यहाँको डम्बर चौक, मोटर स्ट्याण्ड, बागघारा, मेला ग्राउण्ड परिसर, चित्रे अनि राष्ट्रिय राजमार्गको विभिन्न ठाउँहरूमा टाँसिएको छ। 

जनताको नाउँमा जनतालाई नै होशियार बस्नुपर्ने आह्वान गर्दै टाँसिएको उक्त पोस्टरले शहरमा दिनभरी नै चर्चा पाएको थियो। यसरी जनताको नाउँमा टाँसिएको पोस्टरबारे चर्चा चलिरहेको समयमा पुन: दिउँसो जिल्ला माग समितिका कार्यकर्ताहरूले शहरमा निस्केर पोस्टरकै बिरोधमा अर्को पोस्टर टाँसे। 

यहाँको डम्बर चौक अनि विभिन्न स्थानहरूमा जिल्ला माग समितिका कार्यकर्ताहरूले टाँसेको पोस्टरमा ‘जनताको पैसा खानेहरूले जनताको नाउँमा पोस्टर टास्न थाले। अब जनता सचेत बन्नुपर्छ’ भनि लेखिएको छ। यसक्रममा उनीहरूले ‘हामी दिउँसै निस्कने जनता हौँ’ भन्दै जनताको नाउँमा टाँसिएको पोस्टर सिन्टेक्समा पैसा लुकाउनेहरूले टासेको हो भनि आरोप लगाइएको छ। 

यसक्रममा जिल्ला माग समितिका युवा संयोजक अमिर बस्नेतले जनताको नाउँ टाँसिएको पोस्टर वास्तवमा नेताको पोस्टर हो भनि आरोप लगाउँदै जनताको नाउँ मात्र प्रयोग गरिएको बताएका छन् । 

‘जनता गरीब छन् । उनीहरूकोमा पर्चा छपाउने पैसा छैन। यो जती पनि पोस्टर टाँसिएको छ जनताको नाउँमा पैसा भएका नेताहरूले टाँसेका पोस्टरहरू हुन्’- अमिर बस्नेतले भने। अर्कोतर्फ यता जनताको नाउँमा टाँसिएको पोस्टरबारे कालेबुङका विधायक डा. हर्कबहादुर छेत्रीले प्रतिक्रिया व्यक्त गर्दै पोस्टर गोजमुमो पार्टीले टाँसेको आरोप लगाएका छन्। ‘जतिबेला कुनै राजनैतिक दलसित वास्तविक मुद्दाको अभाव हुन्छ, जब एउटा नयाँ दलसित डराईरहेका हुन्छन् अनि तिनीहरूलाई तर्कसंगत ढङ्गले सामना गर्न सक्दैनन् त्यतिबेला जनताको नाउँमा पोस्टर टाँस्ने गर्छन्” – डा. हर्कबहादुर छेत्रीले भने। 

‘हाम्रो जनता यति धनी छैन कि यति राम्रो पोस्टर छापेर टाँस्न सकोस् अनि यति सचेत पनि छैनन् कि छ दिनसम्म पानी नपाउँदा चुप बस्ने जनताले हठात् गोर्खाल्याण्डको निम्ति पोस्टर टाँसोस्। यो मोर्चाका साथीहरूले डराएर टाँसेका पोस्टर हुन् भन्ने सबैले जान्दछन्’ – डा छेत्रीले अझ भने। 

यसक्रममा उनले केहि दिनपछि जनताको नाउँमा पोस्टर टाँसिने भन्दै त्यसबेला साँचो जनताले पोस्टर टाँस्ने बताएका छन्। ‘मोर्चाले सोझै आफ्नो नाउँमा पोस्टर टाँस्न सक्न छोड्यो। जनताको अघि आउने साहस नभएको झलक नै जनताको नाउँको पोस्टर हो” छेत्रीले अझ भने। उनले उक्त पोस्टर पूर्ण रूपले गोजमुमो पार्टीले टाँसेको हो भन्दै बङ्गालको दलाल भन्नेहरूले नै वास्तवमा बङ्गालको दलाली गरिरहेको आरोप लगाए। ‘जीटीएको चौकिमा उनीहरू बसेका छन्। बङ्गालबाट पैसा आएको प्रयोग अथवा दुरूप्रयोग उनीहरूले गर्छन् अनि हामीलाई बङ्गालको दलाल भन्छन्’ उनले भने। 

यसक्रममा उनले गोजमुमो पार्टीलाई चुनौति दिँदै ‘यदि गोजमुमो पार्टी गोर्खाल्याण्ड प्रति ईमान्दार छौँ भन्छ भने भोलि नै जीटीए जिम्मा लगाऊ अनि गोर्खाल्याण्डको आन्दोलनमा झर, हर्कबहादुर छेत्रीले नयाँ पार्टी पनि खोल्दैन हर्कबहादुर पनि तिम्रै पछि कुद्नेछ” भने। उनीहरूले जीटीएको चौकि त्यागे जनतामा राम्रो सन्देश जानेछ भन्दै चौकिको लोभी भने गोजमुमो पार्टी नै रहेको आरोप लगाए। 

‘दुई-दुईपल्ट सपथ ग्रहण गर्न लाज नमान्ने विमल गुरुङ अनि आज हामीलाई चौकिको लोभी भन्दैछन्। यद्यपी जीटीए थन्काएर आन्दोलन गर हर्कबहादुर अघि आउनेछ’ भने।