125औ कालेबुङ ईसाई सम्मेलन सम्पन्न

कालिमन्युज, कालेबुङ, 24 अक्टोबर 2015: ब्रिटिश कालिन चर्च अव स्कटल्याण्ड्ले पठाएका मिशनेरिहरुले प्राय डेड सय वर्ष अघि धर्म प्रचार गर्न गठन गरेको इस्टर्न हिमालयन मिसनले कालेबुङलाई एक जिल्लाको रुपमा मानिलिएको थियो । आज त्यही जिल्लाको माग पुन उठिरहेको बताउदै यसको विवरण त्यस समयनै प्रकाशित बिभिन्न पुस्तिकाहरुमा गरिएको जानकारी छिबो कर्क सेसनका मोडरेटर तथा युनाइटेड क्रिस्चियन माइनोरिटि सोसाइटिका अध्यक्ष अनि इष्टर्न हिमालयन चर्च काउंसिलका डेपुटि मोडरेटर रेभरेण्ड जेम्स पावल लेप्चाले प्रमुख वक्ताको रुपमा बोल्दै कालेबुङ स्थानिय कर्क सेशनद्वारा आयोजित् 125औ कालेबुङ् वार्षिक ईसाई सम्मेलनमा गराए।

स्कटिश मिशनेरिहरुले त्यस समय धर्म प्रचार मात्रै गरेनन तर यहाँका मानिसहरुको शैक्षिक्, आर्थिक र स्वास्थ्य सम्बन्धित क्षेत्रमा विकाश गर्ने भरमग्दुर काम गरे जसको उपभोग आज पनि हामीहरुले गरिरहेको तिनले आफ्नो प्रवचनमा स्मरण गराए। आज ती मध्ये कतिपय संस्थानहरु हामीले गुमाए पनि अरु रहेकाहरुको जगेरा गर्नु अनि त्यस्तै समाज निर्माण काम सबैले गर्नु पर्ने उत्तरदायित्व कालेबुङ्बासी सबैको रहेको तिनले बताए।

"बाटो यही हो त्यसैमा हिडँ" विषयमा बोल्दै तिनले हाम्रा अग्रजहरुले खनेका असल मार्गमा हिड्दै मण्ड्ली समाज र देशको निम्ति सभ्य, सुशिल, योग्य, इमान्दार, परिश्रमी अनि कर्तव्यपरायण नागरिक बन्न र बनाउनमा लागी पर्नु पर्ने आजको समयको माग रहेको कुरा छवटा मुख्य सभाहरुमा क्रमिक रुपमा बोल्दै बताए।

उक्त कालेबुङ् वार्षिक ईसाई सम्मेलन गत 20 अक्टोबरदेखि प्रारम्भ भएर गत 23 अक्टोबरसम्म यहाको नौ माइल स्थित वर्शिप सेंटरमा सम्पन्न भयो ।
युसिएनआइको इस्टर्न हिमालयन चर्च काउंसिल अधिनस्थ कालेबुङ स्थानिय कर्क सेशनद्वारा आयोजित् यस सम्मेलनको प्रथम दिनको उद्घाटन कार्यक्रम स्थानिय कालेबुङ कर्क सेसनका मोडरेटर रेभरेण्ड एच डी सुब्बाको सभाधक्ष्यता र संचालनमा प्रारम्भ भएको थियो। सम्मेलनमा बाइबल अध्यापकको रुपमा पकाङ कर्क सेसनका रेभरेण्ड सिल्भानस लेप्चा आमंत्रित थिए। धेरै संख्यामा कालेबुङ महकुमा भरिका विभिन्न युसिएनआइ मण्ड्लीबाट आएका प्रतिनिधिहरु तथा कालेबुङ कर्क सेसनको अधिनस्थ रहेका विभिन्न मण्ड्ली लगायत स्थानिय मेकफार्लेन मण्ड्लीका सदस्यहरु 4 दिने सम्मेलनमा उपस्थित थिए। कर्क सेसनले 125 औ वर्षगाठ्को उपलक्ष्यमा वर्ष भरिनै प्रत्येक तिन तिन महिनामा विभिन्न कार्यक्रम आयोजन गरिने भएको जानकारी सम्मेलनमा बताइयो । यसमा प्रमुख रूपमा विभिन्न प्रदर्शनि, प्रतियोगिता, प्रकाशन, सेमिनार वर्कशप आदि रह्ने जनाइएकोछ।

सम्मेलनमा पुरुष, स्त्री अनि युवाहरु लगायत टीन एमबासेडर्सहरुको बेग्ला बेग्लै सभाहरु पनि आयोजित भयो भने बेलुकी शिक्षामूलक फिल्महरु प्रदर्शन गरियो तथा बहु प्रतिभा प्रदर्शन साँझको समय युवा तथा आमाहरुले आ- आफ्ना विभिन्न प्रतिभाहरु पदर्शन गराउदै मनोरंजन साथ उत्साह दिए।

यता सम्मेलनकै समय वर्शिप सेंटरमा नै पूर्विय हिमाली पुरूष गिल्ड, इएचसीसी अधिनस्थ कालेबुङ आंचलिक पुरूष गिल्ड्को पनि पुनर्गठन गरि नयाँ कमिटि गठन गरियो । जसमा सभापति रेभ टी एस मोलोमु, उपसभापति एल्डर नगेन्द्र राई, सचिव एल्डर डोगेन काबो, सहसचिव एल्डर युलिस लेप्चा, कोषाध्यक्ष एल्डर डी बी ढुङेल अनि सह कोषाध्यक्ष बिशाल लेप्चा चुनिए भने उनीहरुलाई मोडरेटर रेभरेण्ड सुब्बाले उनिहरुको निम्ति प्रार्थना गर्दै समर्पण गरे।