स्वच्छ भारत अभियान : सरकारी कार्यलयहरूको परिसरमा मैलाको थुप्रो

 डी.के वाइबा, कालिमन्युज, कालेबुङ 20 जनवरी। ‘स्वच्छ भारत अभियान, स्वच्छताको निम्ति एक कदम अघि’ स्लोगन दिएर भारतका प्रधानमन्त्री नरेन्द्र मोदीले आफ्नो हातमा झाडु लिएर 2 अक्टोबर 2014 गान्धी जयन्ति दिन देशव्यापी सफाई अभियानको शंखनाद गरे। भारतका प्रधानमन्त्रीले आफ्नो हातमा झाडु बोकेर सडक सफाइको निम्ति निस्केको यो नै पहिलो घटना थियो। 

भारतमा राष्ट्रपिता महात्मा गान्धीलाई मैला कहिल्यै मनपर्दैन थियो। यसैकारण प्रधानमन्त्री मोदीले महात्मा गाँधीको सपना पुरा गर्न देशव्यापी स्वच्छ भारत अभियान चलाए। चारैतिर सफाई अभियान चल्यो। नेताहरू देखि लिएर प्रशासनिक अधिकारीहरू सबै देशलाई सफाई गर्न सडकमा झाडु बोकेर निस्के। यता दार्जीलिङ पहाडमा पनि स्वच्छ भारत अभियान चल्यो। गोर्खाल्याण्ड क्षेत्रिय प्रशासन प्रमुख बिमल गुरूङ स्वयंले स्वच्छ भारत अभियान चलाए। दार्जीलिङ पहाडलाई स्वच्छ भारत अभियान संग जोड्न बिमल गुरूङ आफै झाडु बोकेर सडकमा निस्किए। उनलाई साथ दिन पहाडका सासंद एसएस आहलुवालीय अनि सभासद रोशन गिरी पनि हातमा झाडु बोकेर सफाई अभियानमा जुडे। त्यसपछि पहाडव्यापी चल्यो स्वच्छ भारत अभियान। 

दार्जीलिङको चौरास्तामा हजारौँ मानिसहरू भेला भएर पहाडकी रानी दार्जीलिङलाई स्वच्छ अनि सुन्दर बनाउँन जीटीए प्रमुख बिमल गुरूङ संगै कसम खाए। अनि शहरदेखि गाउँ-गाउँ पुग्यो स्वच्छ भारत अभियान। तर अहिले आएर उक्त स्वच्छ भारत अभियान मानिसहरूलाई कुन चराको नाउँ हो भने जस्तै बन्न थालेको छ। ठाउँ ठाउँमा स्वच्छ राखौँ लेखिएको प्ला कार्डहरू छ अनि उक्त प्लाकार्डहरू छोप्ने गरि मानिसहरू स्वच्छ भारत अभियानको नारालाई अन्देखा गरेर निर्धक्क आफ्नो परिवेश प्रदुषित पार्दै मैलाका थुप्रोहरू थुपारिरहेका छन्। झोडा नालाको कुरा नै नगरे हुन्छ सरकारी कार्यलयहरूको परिवेश समेत अहिलेघरी स्वच्छ भारत अभियान देखि कोशौँ टाडा रहेको देखिन्छ। यसको ज्वलन्त उदाहरण कालेबुङ महकुमा अधिकारीको कार्यलय हेरे स्पष्ट बन्नेछ। 

अघिबाट सुन्दर अनि स्वच्छ देखिने उक्त महकुमा अधिकारी कार्यलयको पछिल्लो भाग हेर्नु हो भने मैलाको थुप्रोहरूले पुरिन्दै गइरहेको छ। मानौ कालेबुङ महकुमा अधिकारी कार्यलयका अधिकारी अनि कर्मचारीवर्गलाई स्वच्छ भारत अभियानको कुनै जानकारी नै छैन। यस सम्बन्धमा महकुमा अधिकारीलाई भेट्न चाहँदा उनी बाहिर गएका थिए। यसैक्रममा महकुमा अधिकारी कार्यलयकै एकजना कर्मचारीलाई स्वच्छ भारत अभियान कार्यलयले पालन गरिरहेको छ भनि जान्न चाहँदा यसबारे आफूलाई थाह नभएको बताए। यतिमात्र होइन उनले आफूलाई स्वच्छ भारत अभियान बिषयमा अहिलेसम्म पत्तो नभएको बताएर आश्चर्य चकित सम्म पारे। 

‘स्वच्छ भारत अभियान के हो मैले त आज नै सुन्दैछु’ उक्त कर्मचारीले भने। उक्त कर्मचारीको कुरालाई विश्वास गर्नु हो भने पनि महकुमा अधिकारी कार्यलय परिसरमा स्वच्छ भारत अभियान नचलेको स्पष्ट बनेको छ। किनभने कार्यलयको पछिल्लो परिसर पूर्णरूपले प्रदुषित बनेको छ। जसले गर्दा स्वच्छ भारत अभियानको नारा फिका फिका बन्न पुगेको छ। यतिमात्र होइन यहाँको आपकारी बिभागको कार्यलय, खण्ड बिकास अधिकारीको कार्यलय, नगरपालिका कार्यलयको अतिथि गृह, ट्रेजरी कार्यलय सबै कार्यलयहरूको अघिल्लो आँगन मात्र स्वच्छ अनि सफा राखिएको देखिन्छ तर जसै क्यामेरा सबै सरकारी अधिकारीवर्गको कार्यलयको पछिल्लो भागमा पर्न जान्छ सम्पूर्ण सवच्छ भारत अभियानको पोल स्वत खोलिन पुगेको छ।