बसिल कम्पनिको कार्यलयबाट सम्पूर्ण दस्तावेज पुलिसद्वारा जफ्त

डी के वाइबा, कालिमन्युज, कालेबुङ 7 अगस्त 2014। करोडौँ रूपीया निवेशकर्ताहरूको फिर्ता गर्न नसक्ने बसिल ईन्टरनेशनल लिमिटेड कम्पनिको कार्यलयबाट पुलिसले सम्पूर्ण कागतपत्र जफ्त गरेको छ। निवेशकर्ताहरूको पैसा म्याच्युरिटी भएर पनि लामो समय कम्पनिले फिर्ता नगरेको निवेशकर्ताहरूको आरोप रहेको छ। 

सोही क्रममा निवेशकर्ताहरूले केही हप्ता अघि बसिल कम्पनिको कार्यलय तोडफोड पनि गरेका थिए। निवेशकर्ताहरूले कम्पनि बिरुद्ध कालेबुङ थानामा प्राथमिकी समेत दर्ता गरेको कारण पुलिसले पनि कम्पनिको क्रियाकलाप माथी गिद्धे नजर गाडॆको थियो। यसक्रममा आखिरमा आज दार्जीलिङ पुलिसको ‘जिल्ला ईंन्फोर्समेन्ट बिभाग’ले यहाँको कञ्चन सिनेमा हल नजिक अवस्थित बसिल कार्यलयको ताला तोडेर अफिस भित्र रहेका सम्पूर्ण दस्तावेजहरू आफ्नो अधिनमा लिएको छ। यद्यपी यस अवधी कार्यलयमा कम्पनिका पदाधिकारीवर्गहरू भने कोही उपस्थित थिएनन। 

अचानक पुलिस बल बसिल कार्यलयमा पुगेर ताला तोडफोड गरी कार्यलयको जाँच गर्दा कार्यलयमा निवेशकर्ताहरूको एकाधिक पासबुक लगायत अन्य कागतपत्र फेला परेको थियो भने कार्यलयमा राखेको कम्प्युटर पनि पुलिसले आफ्नो अधिनमा लिएको छ। यस अवधी मानिसहरूको पनि कार्यलयमा भिड जमेको थियो। यस समबन्धमा बसिल कम्पनिका अधिकारीवर्गसंग सम्पर्क गर्न खोज्दा कुनै सम्पर्क हुन सकेन। 

स्मरण रहोस पश्चिम बङ्गालमा चिटफण्ड कम्पनि सारदा घोटाला पछि एकपछि अर्को फर्जी कम्पनिहरूले मानिसहरूलाई ठग्दै आईरहेको खुलासा भईरहेको छ। यस बिषयमा निवेशकर्ताहरूले आफ्नो लगानी कम्पनीहरूबाट फिर्ता नपाए पछि मानिसहरू चिन्तित बनिरहेका छन। 

कालेबुङ शहरमा सञ्चालन भईरहेको बसिल, प्रयाग ग्रुप अफ कम्पनी, एक्सिस मल्टि डेभलभपर, रोजभेल्ली आदि कम्पनीहरूले पनि निवेशकहरूको पैसा म्याचुरिटी भएर पनि फिर्ता गर्न नसकेको खुलासा भईसकेको छ।

यस समबन्धमा निवेशकहरूले आफ्नो लगानी गरेको पैसा फर्काउन दबाव बनाईरहेको भए पनि कम्पनिले भने बिभिन्न बहाना बनाएर लामो समयदेखी पैसा फिर्ता गर्ने कार्य गरेको छैन। जसको कारण करोडौँ पैसा बोकेर कम्पनिहरू चम्पट कसिरहेको दिन दिनै खुलासा भएको छ। यस्तो स्थितिमा आज पुलिसले बसिल कम्पनिको कार्यलयमा पुगेर ताला तोडफोड गरी आवश्यक दस्तावेजहरू आफ्नो अधिनमा लिए पछि बसिलका निवेशकहरू आफ्नो लगानी पैसा फिर्ता नपाउँने डरले अझ चिन्तित बनेका छन।