नाबालिक छोरीलाई यौन शोषण गर्ने पिता पक्राऊ

डी के वाइबा, कालिमन्युज, कालेबुङ 10 जून 2014। आफ्नै नाबालिक छोरीलाई यौन शोषण गर्ने पितालाई कालेबुङ पुलिसले पक्राऊ गरेको छ। घट्ना यहाँको साँढे बाह्र माईल नजिकको हो। जानकारी अनुसार 14 वर्षिय खुशी राई (काल्पनिक नाम) लाई आफ्नै पिता रणबहादुर राई (37)ले गत 2 वर्षदेखी लगातार यौन शोषण गरिरहेको घट्ना प्रकाशमा आएको छ। आरोपी पिता रणबहादुर राईलाई पुलिसले पक्राऊ गरेको छ। यसका साथै उक्त नाबालिकलाई यौन शोषणकै आरोपमा पिता संगै छिमेकी सुवास राईलाई पनि पुलिसले पक्राऊ गरेको छ। 

जानकारी अनुसार नाबालिक खुशी राईलाई आफ्नै पिताले गत दुईवर्ष देखी यौन शोषण गर्दै आईरहेका थिए। उक्त घट्नाबारे बाल-बालिकाहरुको हक र अधिकारको निम्ति कार्य गर्दै आईरहेको गैरसरकारी संगठन ‘बाल सुरक्षा अभियान’लाई सूचना प्राप्त भएको थियो। यसैक्रममा केही दिन अघि मात्र पिडीत नाबालिकलाई छिमेकी सुवास राईले यौन शोषणको प्रयास गरे पछि पुन: बाल सुरक्षा अभियानलाई सूचना आएको थियो। घटनाबारे गाउँमा हो हल्ला भए पछि अज्ञात व्यक्तिले संस्थाको टोल फ्री नम्बरमा फोन गरेर सूचना दिए पछि घटनाको सत्य तत्य पत्तो लगाउँन संगठनका कार्यकर्ताहरुले पिडीत नाबालिकलाई भेटेका थिए। सोही भेटघाटको क्रममा पिडीताले आफूलाई आफ्नै पिताले बारम्बार यौन शोषण गरिरहेको अनि सुवास राईले पनि जब्बरजस्ती यौन शोषणको प्रयास गरेको जानकारी दिएकी थिई। सोही आधारमा आज पिडीताले कालेबुङ थानामा प्राथमिकी दर्ता गरे पछि कालेबुङ पुलिसले आरोपी पिता संगै छिमेकीलाई पक्राऊ गरेको छ। 

बारम्बार यौन शोषणको शिकार भएकी पिडीताले घटनाबारे पहिला बताउँन डर माने पनि पछिबाट भने सबै पुलिसलाई पनि बताएकी थिईन। सोही आधारमा आरोपीहरुलाई तत्काल पक्राऊ गरिएको छ। यता आरोपी पिताले केही महिना अघि मात्र घरमा कान्छी स्वास्नी ल्याएकी छन। पुलिसले आरोपीहरुलाई पक्राऊ गरेर थानामा ल्याईपुर्‍याएको छ भने पिडीत नाबालिकको आज नै यहाँको महकुमा अस्पतालमा स्वास्थ्य जाँच गरिएको छ। आरोपीहरु बिरुद्ध भारतीय दण्ड सहिताको धार 376 अंतर्गत मुद्दा दर्ता गरेर भोली यहाँको न्यायलयमा पेश गरिने जानकारी प्राप्त भएको छ। 

स्मरण रहोस यसवर्ष कालेबुङ महकुमा क्षेत्रमा लगाताररुपले नाबालिकहरुलाई यौन शोषणको घटना यो चौथो हो। यस अघि टिस्टामा 3 बर्षिय नाबालिक, गेलखोलाका 9 बर्षिय नाबालिक अनि रम्फूमा 4 बर्षिय नाबालिकलाई यौन शोषण गरेको घटना प्रकाशमा आएको थियो। तीनवटा यौन अपराधका घटनामा आक्रोशित बनेका मानिसहरुको आक्रोश बिस्तारै सेलाउँदै गईरहेको समयमा पुन: आफ्नै नाबालिक छोरीलाई यौन शोषण गरेको घटनाले सनसनी छाएको छ।